GLĚDAJŚO! Nowy! Dolnoserbski Firefox 49.0.1 jo wujšeł! Ześěgnjeńske wótkaze na toś tom boku nalěwo.

Webwobglědowak Firefox dolnoserbski

Co jo Firefox?

Firefox jo tak pomjenjony browser, webwobglědowak, to jo program, z kótarymž móžośo se internetne boki wobglědaś. Dalšne znate wobglědowaki su Google Chrome, Internet Explorer a Opera.

Wót lěta 2014 jo dolnoserbski Firefox oficielny, to groni, wózjawja se na oficielnych bokach Mozilla. Ale historija pśełožkow Firefox do dolnoserbšćiny jo wó wjele starša - prědny pśełožk jo južo w lěśe 2008 wujšeł.

Firefox jo naslědnik browseroweje komponenty něgajšneje suity Mozilla, kótarejež dalejwuwiśe jo SeaMonkey. Na rozdźěl wót SeaMonkey, kótaryž jo pakśik programowych komponentow, jo Firefox lutny webowy wobglědowak, kótaryž wšak dajo se wó dodanki (programowe rozšyrjenja, za wudopołnjenje jogo funkcionality, a drastwy, za pśeměnjenje jogo wenkownego wuglědanja) rozšyriś. Głowne websedło za to jo addons.mozilla.org, skrotka, AMO.

Oficielne websedło za Firefox jo https://www.mozilla.org/dsb/firefox/desktop/. Jolic cośo se nimski informěrowaś, woglědajśo se nimske websedło www.camp-firefox.de. Tam móžośo teke nimskorěcny Firefox ześěgnuś.

Firefox jo za rozdźělne źěłańske systemy (Windows, Linux, Mac OS X atd.). Pśeglěd wó cuzorěcnych wersijach za źěłowe systemy Windows, Linux a Mac OS X namakajośo na https://www.mozilla.org/en-US/firefox/all/, pód zapiskom Lower Sorbian teke za dolnoserbšćinu.